2017/2018 Saisonrückblick Jun. F Adler

Saisonrückblick F Adler 2017/18

Mit ere buntgmischte Truppe hei dr Hansruedi u ig letscht Ouguscht, nach längerer Pouse aus Junioretrainer, d F Adler überno. Mir hei nid so rächt gwüsst was üs da erwartet u hei gspannt dr Trainingsbetrieb ufgno.

Äs isch sofort klar gsy das aui Meitschi u Buebe sehr motiviert si zum drzue lerä. I jedem Training hei mir jongliert mit däm Bau u jedesmau het dr Tagessieger dr Jonglier-Pokal dörfe hei näh bis zum nächschte Training. Meischtens ischs ä ängi Sach gsy u fasch aui Ching hei dä Chübu mau dörfe mitnäh. 

Üs isch es ou sehr wichtig gsy, dä Ching z lerä ire Gruppe respektiv äbe aus Team ufzträtte u das aui enang so akzeptiere wie si si. Mir hei mega Fröid isch üs das so guet glunge u isch i derä Zyt es richtigs Team entstande.

A dä Turnier hei mir üs vo mau zu mau chönne steigere. Am Afang hei mir zwar scho mänge Match verlore aber umso schöner isch es de när aube gsy we mir ä Sieg hei chönne fyre.

Ir Hallesaison isch es bi üs ruhiger gsy. Mir hei am Samschtig immer ir Seelandhalle z Kerzers trainiert u viu gmatchlet. Z Highlight isch de üses Heimturnier in Kerzers gsy. Mir hei zwar nid ganz eso abgschnitte wie mir üs das vorgno hei aber es het gfägt. U glich hei aui druf planget ändlech wieder die «richtige» Schuttschueh chönne vürä z näh u im Erli d Rückrundi z starte.

7 Turnier hei mir ir Rückrundi gha u so hei sich d Trainings u d Turnier a dä Samschtigmörge meh oder weniger abgwächslet. Ou ir Rückrundi hei mir mit es paar wenige Usnahme super gspiut u viu Matche chönne gwinne.

Am Finalturnier in Courtepin hei mirs bis is Haubfinal gschafft u dert leider knapp verlore. Z ersch si scho grad aui chly enttüscht gsy – aber wo s de när ä Medaille gä het, hei die Chinderouge wieder gstrahlet u d Niederlag isch vergässe gsy.

Mir wettä üs a derä Stell bi aune chlyne Adler fürä Isatz u die viele luschtige u lehrriche Stunde wo mir im Training oder a dä Turnier zäme verbracht hei bedanke. Mir dankä ou aune Eltere härzlech, wo üs a dä Turnier immer tatchräftig ungerstützt u Ihri Ching umechauffiert hei.

Mir si stolz ufd Fortschritte wo jedes einzälna i derä Saison gmacht het! BRAVO u machet witer so!

Itz wünsch mir Öich ä schöne Summer u fröie üs uf witeri Abentüür mit dä Adler i dr nöie Saiaon.

 

Kerstin Streit / Hansruedi Zesiger