Wie doch die Zyt verflügt… ob äch das a üsem Teamname ligt😊
Scho isch wieder Juli u mir hei bereits dr Saisonabschluss mit aune F-Teams im Erli gfiiret.
Es isch ä fägegi u erfougrichi Saison gsy, wo mir mit dä Adler hei chönne erläbe. Es het jedes Ching gueti Fortschritte chönne mache u ou aus Team hei mir üs verbesseret.
A dä Turnier im Herbscht si mir super gsy u hei meh oder weniger geng gwunne.
Das het de a dä Halletrunier nid ganz eso rosig usgseh aber mir hei üs ou ir Halle chönne steigere u hei a üsem Heimturnier z Kerzers im Januar äs guets Turnier gspiut.
Läng isch sie geng die Zyt ir Halle u mir hei planget für wieder use ufe Rase chönne ga z schutte.
Grad 7 F-Turnier si für die Rückrundi agseit gsy, das het gheisse das mir nid mängs Training am Samschtig hei gha u drfür si ga Mätsche schutte. Me seit ja das sig z beschtä Training – u de glich hei mir Samschtig für Samschtig ä Hufe Sache gseh wo mir wei verbessere u no viu u lang im Training chöi üebe…
U das mache mir itz de. Abem Summer si de fasch aui Adler aus E-Spieler im Isatz u mir fröie üs uf viu spannendi u herusforderndi Training u Mätsche.
Itz gniesse mir aber z ersch mau dr Summer so richtig bevor mir de im Ouguscht i die nöii Saison bi dä «Grosse» starte.
Merci aune Ching, Eutere u Funktionäre für Öiie Isatz – Dir sit SUPER!!
Kerstin Streit / Hansruedi Zesiger